Billy Elliot

Jæja þá er dagur að kveldi kominn og drengirnir á leið í rúmið nema Glói sem að er að klára eitt af sínum stórkostlegu málverkum.  Þeir eru búnir að hafa það gaman í dag, fóru að heimsækja Kjalar og Heklu og léku sér þar í garðinum, borðuðu heimabakaða kanilsnúða og fóru í fjöruferð.

Við náðum í þá eftir að hafa verið í parketinu í dag og ekki gátum við nú klárað eins og við ætluðum en þetta mjakast allt saman, fórum heim og bökuðum okkar helgar pizzu og strákarnir horfðu á nýjan þátt á stöð 2 um risaeðlur sem að þeim þótti alveg frábær. Eftir það var horft á mynd eins og alltaf er gert með þeim um helgar og myndin Billy Elliot varð fyrir valinu núna.  Þeim leist nú ekki sérstaklega vel á í byrjun að ég ætlaði að láta þá horfa á mynd um strák sem að vildi læra ballett.  En þegar ég sagði þeim að þetta væri enginn venjulegur strákur, hann væri fátækur drengur sem að væri búin að missa mömmu sína og pabbi námuverkamaður í verkfalli og amman ætti heima hjá þeim og væri gömul rugluð kona, þá fannst þeim að þetta hlyti að vera áhugaverð mynd.

Ég get með sanni sagt að myndin féll í góðan jarðveg og þeir nutu hennar fram í fingurgóma, og auðvitað tók Ragnar yngri nokkra takta eins og hans er von og vísan eftir að myndinni lauk.

Ég stakk upp á að það væri nú ef til vill gaman að verða sér úti um Svanavatnið á DVD og þeir tóku vel í það.

Við erum komin núna niður og þeir að fara að hátta og bursta tennur og hlakka til morgundagsins því að þá skal baka "Þarfabrauð" sem að virðist vera í uppáhaldi kynslóð eftir kynslóð, þessi gamla góða uppskrift frá henni langa-langömmu, og Jökull pantaði heitt súkkulaði með, þannig að mér sýnist að það verði gamaldags sunnudagur á morgun.